EPISTEL MINGGU RoOGATE
Penulis:
Pdt. T. S. Gultom, S. Th. (Medan Kota)
MINGGU, 22 MEI 2022, Songon sahalak na bajar dope si Jeremia, jadi mansai borat do panghilalan ni si Jeremia laho manjalo panjouon ni Debata di ibana asa gabe panurirang, ai di tatap ibana maol ni ulaon sahalak panurirang, ala ni i do gabe manjua ibana di mula ni panjouonna. Alai marhite hata ni Debata na paposrohana, paboa naung di tahi Debata hian ibana uju di bortian dope. Mansai balga do pangontak ni hata ni Debata na mangonjar si Jeremia laho mangoloi panjounNa i.
Na mangula do ibana di Juda, di ujung ni abad VII sahat tu parmulaan ni abad VI sM. Jadi, keadaan sosial politik hatiha i ndang stabil, hinorhon ni panggosagosa ni angka harajaon na balga di humaliang nasida, na marsorinsorin manaban bangsoi. Ndada holan di politik alai sahat do nang tu ekonomi nang parugamoon nasida. Ai termasuk do debata baal di boan angka bangso na manaban nasida, gabe sisombaon di Juda. Ala ni i, ndang be lomo ni roha ni Debata di ula nasida. Jadi masa ma angka pangalaho na hinagigihon ni Debata, isarana: ketidakadilan, korupsi, amoral/sex, dan lain-lain.
Turpuk epistel on, ima patuduhon hasisintong ni bagabaga ni Debata taringot tu hamumulak sian Babel. Hamumulak manang di pulihkan na marlapatan doi mulak tu na somal, tu kondisi na uju i manang mulak tu na somal andorang so di taban dope.
HATORANGAN
Ayat 1-2: On ma hata na paduahalihon dipasahat Debata tu si Jeremia. Ujui di bagasan na tarhurung ibana di bilut hurungan na di bagas ni raja sian Juda. Di tungkum parangan ni raja Babel do Jerusalem hatihai. Ndang adong na boi mangambati hasisintong ni bagabaga ni Debata laho mamboan mulak bangsona, hurungan sandiri ndang margogo mangambatisa. Debata do na patupahon, Debata na paulakhon bangsoNa. Debata sitompa langit dohot isina sude, na manjadihon dohot na pasunhon. Jahowa do GoarNa patuduhon paboa Ibana do na marbagabagahonsa jala laos Ibana do na pasauthonsa (2Musa 6:2).
Ayat 3: Songon dia do dalan manjalo hamumulak/pemulihan on? Tontu marhite tangiang. Dung dijalo si Jeremia angka hata ni Debata taringot tu pemulihan ni bangso i, ingkon di bagasan serep ni roha dohot haporseaon do ibana marpangoloion tu Debata. Martangiang do ibana (32:16), alai ingkon torus do martangiang, i do tugas na parjolo na pinasahat ni Debata tu ibana. “Jou-jou ma ho tu Ahu”…, sada parsuruon na parjolo ma i na ingkon ulahonon ni si Jeremia asa boi dapot bagabaga i. Ingot ma halak na mangharingkothon mulak ngoluna tu na somal, sian na marsahit gabe hipas, sian na gagal gabe maruntung, sian na marsak gabe marlasniroha, dohot lan na asing. Jadi, sian Debata ingkon do manongtong martangiang.
Ayat 4-6: Taida ma paet ni ngolu ni bangso i di tingki tartaban nasida. Bagas ni huta dohot bagas ni raja pe nunga maloha. Bahkan adong pe bagas partabunian, hape gabe inganan bangke ni jolma na marmatean. Tubu ma angka sahit, alai diparade Debata do ubat na mujarab pamalumhon, nangpe sahit i ndang tarpamalum be jala mamboan tu hamatean. Alai molo Debata na patupahon pasti do marhamalumon. Lehonon ni Debata ma hadameon dohot hasintongan. Sude angka na denggan, denggan ni parsaoran nasida dohot Debata. Jala ndang adong be di si na manomba debata sileban. Hadameon dohot hasintongan i marharoroan holan sian Debata do. Ndada dame na sian protibion, tetapi na sian Debata. Tangkas taida hasintongan ni bagabaga ni Debata na ingkon saut jaloon ni bangso i, na ingkon paluaonna bangsoNa i, bahkan boanonNa mulak. Jadi, adong ma pemulihan.
Ayat 7-8: Jadi marserak jala di parhatoban do bangso i, hancur jala ndang margogo be, ndang holan Juda alai dohot do nang Israel. Ndang adong be na boi pasadahon nasida huhut mamboan nasida mulak sian parhatobanan i. Alai taida ma Debata ro paluahon mamboan nasida mulak. “Ahu manogihon mulak”….lapatanna inisiatif mulak ndada sian bangsoi, alai sian Debata do. Ibana do na bertindak jala na mangulahonsa. PaulahonNa ma huta naung magargari gabe huta na gonting. TogihononNa ma mulak bangso na tarbuang i tu huta na gonting i jala Debata ma na pahothon nasida, suang songon i di mulana i. Ndang holan i dope, na umbalga sipasahaton ni Debata tu nasida, ima manguras nasida saluhutna sian sude hajahatonnasida, na mardosa nasida dompak Debata, jala marpamuati roha ni Debata mida nasida. Ima gombaran ni pemulihan, paulakhon bangsoi sumuang tu na somal hian uju denggan dope nasida marpangoloion tu Debata.
HAHONAAN
Nuaeng aha ma nanaeng dohonon ni turpuk epistel on tu hita, di minggunta sadarion? Hombar tu Tema minggu “Huaso Ni Tangiang Ni Halak Na Bonar”;
Ndang adong na boi mangambati manang manutup tangiangta tu Debata asa unang tajalo pasupasuNa. Nian sai taadopi do angka hamaolon, tantangan, parsahiton dohot ragam ni hamaolon, alai justru dibagasan na songon i lam dipapatar Debata do hasisintong ni bagabagaNa maradophon hita, bahkan mamboan hita mulak sian angka hamaolon tu hadumaon, sian parsahiton tu hahisaron, margogo jala haruar sian ragam ni angka tantangan. Tontu asa boi jumpang i ingkon na joujou do hita tu Debata, martangiang tu Ibana.
Martangiang i do dalan manjalo pemulihan, mulak tu na somal. Na maol di ekonomi gabe dipauli Debata, na gagal di angka usaha gabe marhasil, na maol dapot karejo gabe dipatudu Debata angka karejona, na marungkil diangka sipatupaon sumarihon ngolu gabe dapotan pangurupion sian Debata, dohot lan na asing. Dipature bahkan dipauli Debata ngolunta ala ni tangiangta tu Ibana. Molo talului Debata di bagasan haringgason, ndang mansadi martangiang tu Debata, alusan ni Debata do angka tangiangta i. “Joujou ma ho tu Ahu”, pandohan on mangarahon hita asa manongtong martangiang, jala holan tu Debata do na gabe hasahatan ni tangiangta. Jadi, dialusi Debata do tangiang ni halak na bonar.
Ende Koor Ama na sering ta bege mandok: “jou-jou do ahu tu Tuhanki na sai tongtong manatap ahu, na mangalusi angka alualungku, na mangalehon angka na ringkot i di ngolu siganup ari’…endeon mangarahon hita asa holan tu Debata hita martangiang jala paposhon rohanta paboa lehononNa do angka na ringkot i di bagasan ngolunta.
Martangiang, di parbuehon i do angka na ringkot di ngolunta. Tangiang do dalan manjalo hahisaron ni pamatang. Nangpe posi sahit na ni aem, bahkan dokter nunga manvonis paboa ndang malum be ho sian parsahitonmu, alai molo porsea do ho di huaso ni Debata na tuk pamalumhon sahitmu jala dipagomos ho tangiangmu tu Ibana, ingot ma pamalumon ni Debata do sahitmu. Tangiang i pe dalanta do i manjalo hasesaan ni dosa, dalan manjalo hadameon.
Repoter: Tohap Simaremare.
